Добриот пастир и Неговото стадо

¹„Вистина, вистина ви велам: кој не влегува низ вратата во овчото трло, а прескокнува од друга страна, крадец е и разбојник; ²а кој влегува низ вратата, пастир е на овците; ³нему вратарот му отвора и овците го слушаат гласот негов, тој ги вика сво­ите овци по име и ги изведува. ⁴И кога ќе ги изведе овците свои, оди пред нив, овците одат по него, бидејќи го познаваат гласот негов; ⁵а по туѓ човек не одат, туку ќе побегнат од него, зашто гласот на туѓиот не го познаваат.“ ⁶Оваа парабола им ја кажа Исус, но тие не разбраа што беше тоа што им говореше. ⁷Тогаш Исус пак им рече: „Вистина, вистина ви велам: Јас сум вратата на ов­ците. ⁸Сите, колку што дојдоа пред Мене, крадци се и разбојници; но овците не ги послушаа. ⁹Јас сум вратата: кој ќе влезе преку Мене, ќе се спаси; и ќе влезе, и ќе из­лезе, и пасиште ќе најде. ¹⁰Крадецот доаѓа само да украде, да убие и да погуби. Јас дојдов за да имаат живот и да го имаат во изобилие. ¹¹Јас сум добриот Пастир. Добриот пастир си го полага животот свој за овците; ¹²а наемникот, кој не е пастир и не е сопственик на овците, ако види дека до­аѓа волк, ги остава овците и бега; и вол­кот ги разграбува и ги распрснува овци­те. ¹³Наемникот бега, зашто е наемник, и не се грижи за овците. ¹⁴Јас сум добриот Пастир; и ги знам Моите, и Моите Ме знаат Мене. ¹⁵Како Мене што Ме познава Отецот, така и Јас Го познавам Отецот; и животот Свој го полагам за овците Свои. ¹⁶И други овци имам, што не се од ова трло, и нив треба да ги приберам; и ќе го чујат гласот Мој и ќе биде едно стадо и еден пастир. ¹⁷Затоа Ме љуби Отецот, зашто Јас животот Свој си го полагам за да го примам пак. ¹⁸Никој не Ми го одзема, туку Јас Сам од Себе го давам. Имам власт да го дадам и власт имам пак да си го земам. Оваа заповед ја примив од Својот Отец.“ ¹⁹И пак настана расправија меѓу Јудејците заради овие зборови. ²⁰Мнозина од нив велеа: „Демон има и не е при Себе. Зошто Го слушате?“ ²¹Други велеа: „Ова не се зборови на бесомачен; може ли демон на слеп да му отвори очи?“