4. Исус нашиот Спасител

Името „Исус“, на еврејски „Јешуа“ буквално значи „спасение“ или „избавување“. Македонски еквивалент би било можеби името „Спасе“, со таа разлика што Јешуа е малку поконкретно во своето значење. Имено Јешуа е скратена верзија од името Јехошуа што буквално значи „Господ е спасение“.

Ова најдобро може да се забележи кога ангелот Габриел и го соопштува името на Јосиф и му вели дека неговата жена (блажената Марија) ќе роди Син и “ќе му го дадеш името Исус зашто Тој ќе го спаси народот свој од гревовите негови“ (ев. Матеј 1:21, Библијата). Зошто да му го даде името Исус? Бидејќи Тој ќе го спаси народот од гревовите.

Оваа реченица на евреите им звучи вака: „Ќе му го дадеш името ‘Божјо спасение’, бидејќи Тој ќе го спаси народот свој од гревовите негови“.

Гледаме дека во името „Исус“ се содржи смислата на Неговото доаѓање на Земјата, во значењето на името „Исус“ се открива Неговата мисија на Земјата – спасување на нас луѓето од нашите гревови.

За многумина се уште не било јасно на кој начин Исус ќе ја изврши оваа мисија, иако во Стариот Завет на неколку места е претскажано дека Исус ќе биде измачуван и жртвуван (распнат) за гревовите на луѓето. (пр. пророк Исаија 53-та глава) Кога Јован Крстителот го видел Исус, на силен глас пред присутните изјавил: „Еве Го Јагнето Божјо, кое ги зема гревовите на светот врз Себе!“ (ев. Јован 1:29, Библијата).

Луѓето многу добро знаеле што значи зборот „Јагне Божјо“, бидејќи секоја година на празникот Пасха принесувале јагне како жртва за Бог. Исус, Божјото Јагне, е Божјата жртва за гревовите на луѓето.

Да на Великиот Петок нашиот Господ Исус Христос се жртвуваше за нашите гревови, за секој наш знаен и незнаен грев. Голготскиот крст е местото каде што секој од нас требаше да се појави и да платиме за сопствените гревови, бидејќи Библијата е недвосмислена по прашањето дека казната за гревовите е смрт.

Но Исус рече не. Јас ќе се жртвувам наместо луѓето. Зошто?

„Зашто Бог толку го возљуби светот, што го прати Својот Единороден Син, за секој што верува во Него да не загине, туку да има живот вечен“
(Изјава на Исус во ев. Јован 3:16, Библијата).

Ова е најпознатиот и најцитираниот цитат од Библијата, бидејќи во една реченица Исус ја објавува големината на Божјата љубов кон нас грешниците, но и Божјата промисла за нашето спасување преку жртвувањето на Исус на крстот.

Една наша поговорка вели: „На човек можеш насила да му земеш, но не можеш насила да му дадеш“. Божјата спасителна рака на Исус е силно испружена кон нас грешниците, но од нас зависи дали ќе се фатиме за таа рака, или ќе ја игнорираме и ќе си тераме по свое, надевајќи се на сопствените сили, на сопствените дела.

Што значи да го прифатиш Исус како Господар на твојот живот?

Тоа не значи само вербално да го нарекуваме „Господ“. Тоа значи да му го отстапиме престолот на нашиот живот и Тој да владее со нашиот живот. Тоа значи Тој да биде воланот на нашиот живот, а не резервната гума што ја вадиме само кога ќе се најдеме во незгода. Тоа значи внимателно да читаме во евангелијата што Исус поучувал и одговорно да го извршуваме тоа. Тоа значи да ја усмериме нашата воља согласно Божјата воља и да живееме со радост знаејќи дека сите наши гревови се простени и дека Исус е со нас не само до смртта, туку и во вечноста.

Денес е денот кога можеш да клекнеш на молитва, да се покаеш за своите гревови и да го прифатиш Исус како Спасител од твоите гревови и Господар на твојот живот.

Доколку се реши да ја прифатиш Божјата рака и Божјата прочка, жртва за тебе, следниот чекор би било да пристапиме пред Бог во молтива. Пред да дојдеме кај Бог со молитва, најдобро е да ги согледаме овие подточки и да размислиме:
Пред се, пред Кого доаѓаме во молитва? Да размислиме каде се наоѓаме ние, а каде е Бог. Да размислиме ретроспективно за нашите гревови што сме ги направиле. Секако не може да се сетиме на сите, но сите длабоко во нас, знаеме за работите кои сме погрешиле. Тие работи едноставно ни доаѓаат на ум и на срце. Потоа, да сме спремни истите да ги признаеме пред Бог и да побараме прочка преку жртвата на нашиот Господ и Спасител Исус Христос. А како би изгледала таа молитва, еве еден пример: